Nisma e referendumit “Të mbrojmë kunën kroate” ka filluar mbledhjen e nënshkrimeve për një referendum në të cilin, nëse shpallet, qytetarët kroatë do të kenë mundësinë të votojnë kundër futjes së euros si valutë kombëtare, ose për mbijetesën e mëtejshme të kunës.

Nisma përbashkët “Të mbrojmë kunën kroate” nga sovranistët kroatë dhe Partia Kroate e të Drejtave (HSP), do të përpiqet të mbledhë rreth 370.000, ose 10 për qind të nënshkrimeve, në më shumë se 250 lokacione në gjithë Kroacinë nga numri i përgjithshëm i votuesve sipas regjistrimit të vitit 2011 në 15 ditët e ardhshme, për shpalljen e një referendumi në të cilin qytetarët do të vendosin nëse janë kundër futjes së euros si valutë dhe për mbijetesën e kunës, e cila është monedha kombëtare kroate për 25 vjet.

Marko Milanoviç Liter, kryetar i komitetit organizativ të iniciativës “Të mbrojmë kunën kroate”, deklaroi se pyetja e referendumit do të ishte: ‘A jeni për futjen e një dispozite në kushtetutën kroate që thotë: Njësia monetare e Republikës së Kroacisë është kuna e ndarë në njëqind lipa?’ Vendimi për ndryshimin e monedhës në Republikën e Kroacisë merret nga votuesit në referendum”.

Milanoviç Liter theksoi se kjo çështje referendumi nuk bie ndesh me marrëveshjet ndërkombëtare që Kroacia tashmë i ka nënshkruar me Bashkimin Evropian.

“Konsiderojmë se Gjykata Kushtetuese e Republikës së Kroacisë do të duhet ta konfirmojë këtë çështje kur të mbledhim një numër të mjaftueshëm nënshkrimesh. Me këtë referendum ne duam t’i kthejmë popullit kroat fuqinë për të vendosur për të ardhmen dhe proceset politike në Kroaci. Euro dëshiron të futet me forcë, pa pyetur opinionin publik të qytetarëve kroatë dhe kjo është ajo që ne duam të ndryshojmë me këtë iniciativë për referendum”, tha Milanoviç Liter.

Ai shtoi se Kroacia ka marrë përsipër të fusë euron në marrëveshjen me Bashkimin Evropian, por se marrëveshja nuk përcakton kohën dhe kushtet se kur do ta bëjë këtë. Liter beson se Kroacia aktualisht nuk është as ekonomikisht dhe as shoqërisht e gatshme për euron.

Ai paralajmëroi se të gjitha vendet anëtare kanë pasur inflacion kur futën euron dhe se as Kroacia nuk do të kursehet./AA/